Föstudaginn 29.janúar skrifuðu Linde Healthcare (ÍSAGA) og einkahlutafélagið PrimaCare ehf. undir viljayfirlýsingu um samstarf.
PrimaCare ehf vinnur að því að reisa spítala fyrir liðskiptiaðgerðir og hótel á Tungumelum í Mosfellsbæ. Gert er ráð fyrir að spítalinn verði um 100-120 herbergja og hótelið allt að 250 herbergja. Áætlað byggingarmagn er um 30.000 fm. Gert er ráð fyrir að fyrsta skóflustunga verði tekin haustið 2010 eða í byrjun vetrar sama árs og að fyrstu aðgerðir fari fram í október 2012.
Samstarfsaðilar PrimaCare eru fjölmargir en þá helstu má nefna Ístak hf., arkítektinn Carlos Zapata og félaga hans í íslensku arkítekta stofunni ABZ og amerísku félögin Shiboomi, Skanska USA og Hill International ásamt Svissneska félaginu Oppenheimer Investment Group.
Linde Healthcare kemur að verkefninu með heildarlausnir á sviði lækninga, þar á meðal lyfjalofttegundir, búnað, flutning, tækniþjónustu og þjálfun. Þessar lausnir skipta miklu máli í læknisþjónustu og heimahjúkrun.
Linde Healthcare fagnar samstarfi við PrimaCare, frumkvöðlafyrirtæki með metnaðarfull áform og hugsjónir.